年廿八洗邋遢,齊齊做環保家務達人

年廿八洗邋遢,齊齊做環保家務達人

年近歲晚,又係時候要大掃除啦!大家知唔知點解一定喺年廿八洗邋遢,而唔係年廿六、廿九呢?俗話有云:「年廿八洗邋遢,若然不洗豈會發」,「廿八」取其諧音「易發」,由於意頭好,所以好多人習慣喺年廿八進行大掃除,將家中嘅塵垢、霉氣一併掃走。

根據傳統,如果過去一年過得順利如意,大家掃地可以向屋內掃,象徵將好運留到來年,但如果過去一年過得麻麻哋,咁就梗係要將所有嘢向外掃,寓意將唔好嘅嘢掃走。講咗咁多農曆新年嘅傳統小知識,又係時候要講下有咩天然清潔方法啦!

1. 牙膏 去茶漬一流 大家飲完咖啡或者茶,久而久之杯上面都會出現頑固嘅污漬,牙膏中含有研磨成分,增加抹布同杯嘅磨擦,輕輕一刷就會輕易去除污漬。

2. 茶葉 去油去味 茶葉內含天然成分,飲茶可以飲進茶葉內嘅營養素,而茶葉渣係去油、去污同除臭嘅絕佳小幫手。用茶葉渣可以清洗碗碟上嘅油膩,亦有光亮潔白嘅效果,同時將茶葉渣放係雪櫃、焗爐,可以去除食物嘅味道。茶葉渣咁多功效,下次用完嘅茶葉渣唔好浪費,全部留起佢。

3. 梳打粉 萬用清潔神器 梳打粉絕對係萬用清潔神器,加熱水可以去除油脂,清潔廚房用具輕鬆話咁易;加白醋可以去頑固污漬,清潔抽油煙機、爐頭最適合不過;加檸檬可以除臭去水垢,清潔浴屏、水龍頭,有效去除水垢之餘仲有檸檬嘅清香。

4. 檸檬加醋 去污去味 白醋含有乙酸,有殺菌、除臭等功用,檸檬切開後加入幾滴白醋,可用來抹微波爐、抽氣扇等。

 

 


發表留言

請注意,留言須先通過審核才會發佈